Os socialistas analizaron as propostas durante un encontro co deputado provincial Antonio Leira, quen salientou que as achegas da Deputación ao Concello de Ordes duplicáronse con respecto a 2014
O grupo municipal socialista de Ordes vén de presentar a súa proposta de actuacións para incluír no Plan de Obras e Servizos (POS) 2019, que convoca a Deputación da Coruña. O voceiro municipal do PSOE de Ordes, Alejandro Manteiga, salienta que se trata “dunha proposta que recolle as distintas demandas que nos ten realizado a veciñanza e que pensamos que son proxectos que beneficiarían a un gran número de veciños e veciñas de Ordes”.
A proposta socialista inclúe nove proxectos por un importe de 924.5050,64 euros. Os máis destacados, orzamentariamente falando, son a renovación da rede de abastecemento na rúa Camposanto (262.531,67 euros), a segunda fase das beirarrúas dende o Casal ao Pazo de Bidueiro (186.899,66 euros) e a senda peonil cara o Camiño Inglés en Vilariño, en Buscás (167.734,71 euros).
Así mesmo, os socialistas piden varios arranxos en pistas, como os asfaltados do Camiño do Barroso (Guindiboo) a Fosado (Montaos) e da pista dende A Armada ao final da aldea (Vilamaior), o aglomerado do camiño de Castrelo á escola de Leira ou o arranxo da pista en Pedre a Tras do Río (Mercurín). A proposta complétase coa ampliación do abastecemento en Achán (Montaos) e a ampliación das beirarrúas á altura do Hostal Barreiro (Leira).
Achegas da Deputación
Unhas propostas que os militantes da Agrupación Socialista de Ordes lle presentaron ao deputado provincial Antonio Leira durante un encontro no que o responsable de Economía da Deputación aproveitou para explicar os criterios de reparto das aportacións aos concellos. Leira defendeu que os criterios actuais da Deputación que preside o socialista Valentín González Formoso son mais equitativos e solidarios cos que había durante o mandato anterior do Partido Popular.
Así, durante o último ano da presidencia de Diego Calvo, Ordes recibiu 773.491,07 euros; mentres que no 2018 conseguiu unha achega de 1.575.073,30 euros. “Durante o mandato do PP na Deputación, Ordes recibiu a metade das achegas económicas que ten agora coa presidencia do socialista Valentín González Formoso”.
Pola súa banda, a secretaria xeral da Agrupación Socialista de Ordes, Elvira Rodríguez Recouso, expresoulle ao deputado provincial o apoio dos socialistas ordenses á construción do centro sociocomunitario, cuxas obras comezarán oficialmente mañá venres. Rodríguez Recouso amosouse convencida de que “será unha obra beneficiosa para a veciñanza e, ademais, levará o nome de Isabel Zendal, figura por cuxo recoñecemento levamos loitando varios anos os socialistas de Ordes e para quen volveremos a solicitar a concesión da Medalla de Galicia”.
